Det var ikkje heilt sikkert kven som var mest spent denne onsdagen i Hallingdalen; lokalsamfunnet eller dei nye studentane. Denne dagen hadde dei venta lenge på alle saman.
– Det er så koseleg her! Eg har grua meg litt, men det har vore så bra, seier Inga Thon Rogne (20), som er ein del av det nye, aller første, kullet lærarstudentar som byrjar på Universitetet i Sørøst-Norge i Hallingdal.
Odelsjenta bur ein time unna studiestaden, så for ho passar det bra med nett- og samlingsbasert utdanning. Ho har allereie møtt likesinna, som Anders Silkebækken (23), som bur på Fagernes og også er odelsgut.
– Det er vel 50 minutt å køyre hit. Men mindre det kjem sau i vegen då, som det gjorde i dag, seier Silkebækken og ler.
LES OGSÅ: Dette er campus Hallingdal
Statsrådhelsing på storskjerm
Minister for forsking og høgare utdanning, Oddmund Hoel, hadde sendt inn ei videohelsing der han gratulerte på den store opningsdagen og sa at han gjerne skulle vore der sjølv.
– De er historiske, seier han til studentane som har valt Gol som studieplass for lærarutdanning, bedriftsøkonomi og IT.
– De kan vere med og forme denne studiestaden i ein viktig fase, og det er stas, seier han.
Statsråden trekte fram at Gol ikkje berre er eit ski- og sykkeleldorado, men også det viktigaste knutepunktet mellom aust og vest.
– Her finn vi verdiskapande bedrifter og næringsliv, skule og helsevesen og eit yrande liv i sentrum av hallingdalsregionen. Alt dette treng kompetente folk. Det treng de. Dette lovar godt for framtida for Hallingdal og for Noreg, sa Hoel frå storskjerm.
LES OGSÅ: Slik var årets studiestart på USN sine andre studiestader
Fleksibelt til fjells
Det var tett mellom ordførarkjedene då alle dei seks hallingkommunane var representerte ved opninga. I tillegg til ei rekkje andre representantar frå lokalsamfunnet, mange frå USN, og dessutan ein og annan litt forvirra fjellturist som fekk med seg konsert med Daniel Kvammen.
– I dag blir det skrive historie på Gol, proklamerte Solveig Vestenfor, regionsrådsleiar og ordførar i Ål, før ho framførte eit feirande dikt på melodi av ei gammal folketone.
– Mange vil studere til fjells i staden for i storbyen, trur regionsrådsleiaren.
USN tilbyr også fleksible sjukepleiarstudium på Torpomoen på Ål.
Lærarutdanninga i Hallingdal startar no i år, og det er framleis ledige plassar. Utdanninga startar ikkje med nytt kull neste år, så for dei som vurderer å starte, er moglegheita no.