– Vi har hatt eit stort håp om å vinne NM, og dette gir oss ein kjempeboost. Vi er klare, motiverte og gler oss veldig til EM.
Det fortel Espen Larsen, økonomi- og marknadsansvarleg i studentbedrifta JETA SB.
Dei stakk av med den gjævaste prisen under noregsmeisterskapen i Oslo 11. juni der unge gründerar frå heile landet konkurrerte i ei rekke ulike kategoriar.
USN stilte med sju studentbedrifter i meisterskapen der USN har for vane å gjere det skarpt, og i år tok studentar frå USN heim heile 4 av 5 prisar. No ventar EM i Athen for JETA, som også vann prisen for beste samarbeid med næringslivet.
– No skal vi konkurrere med dei beste frå dei forskjellige landa, og det er eit superhøgt nivå. Det blir tøff konkurranse, men vi har trua, seier Jonas Eiersland, styreleiar og ansvarleg for berekraft.
LES OGSÅ: Desse tok pris i regionmeisterskapet for studentbedrifter
Potensial til å lukkast i resten av verda
JETA utviklar ein heilelektrisk, mobil luftreinsar som fjernar helsefarleg støv etter sprenging i tunnelar, noko som reduserer risiko for lungesjukdom for arbeidarane.
Løysinga kuttar ned på vassforbruk og handtering av slam, og gjev entreprenørar meir effektiv og berekraftig drift.
I juryen sin grunngjeving vert det mellom anna lagt vekt på at bedrifta skårar topp på innovasjon og nyskapning, og at dei har etablert samarbeid med store aktørar.
Juryen meiner teamet har ein imponerande «drive», relevant erfaring og har demonstrert evne til læring undervegs. Dei legg også fram at bedrifta har potensial til å lukkast i resten av verda.
– Betyr mykje
Blink Panel SB frå campus Bø kom på tredjeplass i kategorien beste studentbedrift og vann prisen for Beste HR-arbeid.
– Det var skikkeleg stas berre det å komme oss til NM, og vi er veldig nøgde no, seier Christine Djupedal.
Studentbedrifta hjelper verksemder med å forstå den yngre generasjonen gjennom skreddarsydde spørjeundersøkingar.
– Dette er ei stadfesting på at det er eit behov for det vi driv med. Vi sit igjen med ein veldig god følelse, seier dagleg leiar Håkon Ulven.
– Som HR-ansvarleg synest eg det er utruleg gøy at vi vann for beste HR-arbeid, seier Silje Marie Næss.
Best in business
Oyster Cleanup SB frå campus Porsgrunn vann i kategorien Best in business, og dei var særs nøgde med prisen.
– Det er ein fin følelse at vi får bekrefta at det er fleire som ser verdien i det vi har jobba med. Dette betyr mykje, og det styrker motivasjonen vår, seier Johannes Skarrabekk, utviklar i bedrifta.
Ved hjelp av kunstig intelligens og avansert bileteattkjenning utviklar dei ein autonom undervannsdrone (ROV) som skal identifisere og plukke trusselen stillehavsøsters frå havbotnen. Slik kan ein beskytte norskekysten og skape verdi i matindustrien ved at østersen vert levert til aktørar som vidareforedlar dei til matmarknaden.
LES OGSÅ: Oppfinnsomme studenter hjelper bedrifter