På vegner av USN signerte dekan Per-Ludvik Kjendlie erklæringa Magna Charta Universitatum 2020.
Denne erklæringa gjer at USN forpliktar seg til å halde oppe og styrkje dei grunnleggjande prinsippa for akademisk fridom og institusjonell autonomi. Dette er ei tydeleg markering av verdiane til universitetet i ei tid der slike prinsipp blir utfordra på globalt nivå, fortel Kjendlie:
– Ved å underteikne Magna Charta Universitatum forpliktar vi oss til å forsvare den akademiske fridommen som er sjølve livsnerven i universitetet. Lausrivinga vår frå politiske og økonomiske interesser er ikkje berre eit privilegium, men ein føresetnad for at vi skal kunne produsere påliteleg kunnskap og utdanne ei kritisk tenkjande befolkning, sa han etter seremonien.
LES OGSÅ: Planlagt forskningssenter fra USN til finalerunden
- Utruleg stolt
Signeringsseremonien er ei høgtideleg samling som fann stad i London, under Magna Charta-konferansen. Der var representantar frå 36 universitetet frå heile verda samla.
Studentleiar Ada Margrethe Seim var også med på signeringsseremonien saman med spesialrådgivar Heidi Tovsrud Knutsen. Seim uttrykte kor viktig dette er for studentane:
– Som studentleiar er eg utruleg stolt av at USN har signert Magna Charta Universitatum. Studentar er avhengige av å ha tillit til at utdanningane våre er av høg kvalitet, noko som sikrast gjennom akademisk ytringsfridom og institusjonell autonomi. Det er ikkje styresmaktene eller næringslivet som skal styre kva vi skal lære og forske på.
Å signere dokumentet er ikkje berre ei symbolsk handling, men ei forplikting. Kvart femte år må erklæringa signerast på nytt, noko som inneber at USN kontinuerleg må arbeide for å halde oppe og vidareutvikle prinsippa.
LES OGSÅ: Ny forskning skal ruste lærere mot stress
Fritt og uavhengig akademia
For studentane skaper signeringa også nye moglegheiter. Mellom anna blir det årleg arrangert ein essaykonkurranse som utfordrar studentar til å utforske tema som inkludering, samfunnsansvar og etikk. USN ønskjer å oppmuntre studentane til å delta, og spesielt studentar innan fag som menneskerettar blir oppmoda til å bidra.
Studentleiar Ada Margrethe Seim avsluttar med ei tydeleg oppmoding:
– Med dei stadig større og alvorlege konfliktane som pregar kvardagen vår, er vi avhengige av å bygge opp under den kritiske tanken og fridommen til å forske. Signeringa er ei tydeleg forplikting til USN om at vi skal stå saman med våre samarbeidspartnarar og arbeide for eit fritt og uavhengig akademia. Avtalen forpliktar oss til handling, ei handling studentane ved USN vil vere med på.
Gjennom medlemskapen sin i EDUC-alliansen, der fire av åtte universitet no har signert avtalen, demonstrerer USN også engasjementet sitt for internasjonalt samarbeid og kunnskapsutveksling.
– Magna Charta minner oss om at utdanning er ein menneskerett og eit felles gode, ikkje ei vare. Universitetet vårt forpliktar seg til aktivt å motarbeide ulikskap i tilgang til høgare utdanning, og til å vere ein pådrivar for samfunnsutvikling i regionen vår, seier Kjendlie.
LES OGSÅ: – Noen bøker bør absolutt forbys