Korleis påverkar kjønnsstrukturar karriereløp, arbeidsmiljø og forsking i akademia? Og kva kan vi konkret gjere for å skape eit meir inkluderande og rettferdig forskingsmiljø?
Ph.d.-stipendiatar og tilsette ved USN blir no inviterte til å delta på det nettbaserte kurset Female Empowerment in Academia.
Dette er eit fleksibelt og fagleg solid tilbod for alle som ønskjer auka kompetanse om kjønnsulikskap i akademia.
Praktisk informasjon
format: nettbasert, asynkront og sjølvstyrt
opent: 15. februar til 15. juni 2026
omfang: om lag 25 arbeidstimar
påmelding: i EDUC-katalogen (educalliance.eu)
Slik er kurset bygd opp
Kurset er delt inn i tre tematiske modular:
- Strukturelle ulikskapar i akademia
- Kjønnsbasert vald og trakassering i akademiske miljø
- Kjønnssensitive metodar i forsking
Kvar modul består av fleire undertema i form av videoførelesingar, supplert med digitale aktivitetar og kursmateriell. Deltakarane følgjer ei tilrådd tematisk rekkjefølgje, men kan tilpasse progresjonen til eigen arbeidskvardag.
Undervisninga er utvikla og gjennomført av eit internasjonalt fagmiljø med ekspertar innan kjønn og akademia. Kurset blir avslutta med ei evaluering, og alle som fullfører, får kursbevis.
Kven passar kurset for?
Kurset er utvikla for akademikarar og forskarar på alle karrieresteg og på tvers av fagområde.
Det kan vere særleg relevant for:
- engasjerte universitetstilsette
- forskarar i tidleg karrierefase
- ph.d.-stipendiatar på tvers av fag og fakultet
Kva lærer du?
Kurset gir innsikt i sentrale mekanismar som påverkar kjønnsbalanse og inkludering i akademia, og går utover rein «avkryssing» av kjønnsperspektiv i prosjekt.
Etter fullført kurs vil du:
- ha betre forståing for korleis kjønnsstrukturar er innvevde i akademia og forskingssystemet
- vere meir medviten og sensitiv overfor utsette grupper
- kjenne til gode internasjonale døme på likestillingsarbeid
- ha styrkt kompetanse i kjønnsmedviten forsking
- ha utvikla verktøy for å bidra til styrking av kvinner i akademia