Mobilitet, utdanning, forsking og innovasjon: EDUC-alliansen held fram med å byggje eit meir samanknytt, samarbeidande og inkluderande europeisk område for høgare utdanning.
Sidan oppstarten i 2019 har EDUC hatt eit tydeleg mål: å styrkje samarbeidet mellom universitet i Europa og gi studentar, forskarar i tidleg karriere, fagtilsette og administrativt tilsette nye moglegheiter for læring, mobilitet og samarbeid.
- Les meir om EDUC og oppdraga (missions) til alliansen (educalliance.eu)
Ved slutten av gjennomføringsfasen 2023–2026 for fleire sentrale tiltak, viser resultata per juni 2026 allereie sterk felles framdrift og tydeleg verknad, både lokalt og på europeisk nivå.
Fakta og tal for EDUC Alliance i perioden 2023–2026
Eit veksande europeisk læringstilbod
Eit av dei mest synlege resultata frå alliansen er det stadig større læringstilbodet som er tilgjengeleg på tvers av alle partnarinstitusjonane.
I 2026 omfattar EDUC mellom anna:
- 110 emne i virtuell mobilitet, med meir enn 6100 studentar og 400 undervisarar fordelte på 380 undervisningsøkter.
- 57 felles emne på doktorgradsnivå, der 46 blir underviste på engelsk.
- 8 språk gjennom språkkurs og andre læringstilbod: engelsk, fransk, spansk, italiensk, tysk, ungarsk, norsk og tsjekkisk.
- Nær 800 studentar på språkkurs og 160 studentar i språklege e-tandem.
Desse tiltaka gir studentane høve til å prøve ut nye læringsformer, samstundes som dei utviklar interkulturelle, språklege, overførbare og tverrfaglege ferdigheiter.
Opnar Europa for ph.d.-kandidatar og forskarar
EDUC bidreg òg til å styrkje vitskapleg samarbeid og støtte forskarar i tidleg karriere.
Viktige resultat så langt er:
- 305 ph.d.-kandidatar har delteke i eit eige emne for karriereutvikling.
- 15 forskingsretta arrangement er gjennomførte, mellom anna forskingssommarskular, doktorgradsseminar og tematiske verkstader. Til saman har dei samla nær 590 forskarar og ph.d.-kandidatar.
- 160 felles forskingsinfrastrukturar er tilgjengelege innanfor alliansen.
Europeisk mobilitet i fleire format
EDUC arbeider for mobilitet i mange former, ikkje berre tradisjonell studentutveksling. Målet er å leggje til rette for erfaringsutveksling, samarbeid og utvikling av nye ferdigheiter.
Så langt har:
- 115 studentar delteke i EDUC-støtta gap-semester-mobilitet.
- 197 europeiske praksisplassar i bedrifter eller forskingsmiljø blitt tilbydde.
- European Summer Schools-initiativet halde fram med å vekse, med 28 merkte sommarskular i 2026 og 110 plassar for EDUC-studentar.
- 111 tilsettmobilitetar blitt gjennomførte, med deltakarar frå mange ulike institusjonelle tenester og fagmiljø.
Tiltak for kompetanseutvikling blant tilsette
Alliansen gir òg nye moglegheiter for administrativt og teknisk tilsette, med særleg vekt på europeisk samarbeid og kunnskapsdeling.
Så langt er det tilbode 15 opplærings- og utviklingstiltak for tilsette, mellom anna:
- språklege e-tandem-program
- mentorordningar
- korte og mellomlange mobilitetsopphald ved partnaruniversitet
Desse tiltaka bidreg til kompetanseutvikling og byggjer samstundes eit reelt europeisk fagleg nettverk.
Ein berekraftig felles dynamikk
Tala viser ei tydeleg utvikling: EDUC er gradvis i ferd med å etablere seg som eit langsiktig europeisk samarbeidsrom. Det er konkret, strukturert og tilgjengeleg, og blir stadig tettare knytt til akademiske og institusjonelle praksisar.
Bak resultata står engasjerte vitskaplege tilsette, administrativt tilsette og studentar som kvar dag er med på å forme livet i alliansen.
Denne milepålen viser ein dynamikk som framleis er i utvikling, men som allereie opnar nye moglegheiter for det breiare akademiske fellesskapet og samarbeidspartnarane rundt det. På lengre sikt er målet å etablere varige samarbeid som kan vekse og utvikle seg over tid, og som styrkjer koplingane mellom utdanning, forsking og innovasjon på europeisk nivå.
Abonner på det kvartalsvise EDUC-nyheitsbrevet for å følgje utviklinga i desse initiativa og få dei siste nyheitene frå alliansen.
- Subscribe to the EDUC Quarterly Newsletter (educalliance.eu)