Klokka er 14 i norsk tid.
I den litle universitetsbyen Manipal i India viser urskiva 17.30. I Ontario i Canada er ho åtte på morgonkvisten.
Det er då professor Line Joranger frå Universitetet i Søraust-Noreg (USN) set seg ned for å ha digital undervising med studentane som sit på kvar si side av kloden, gjennom det nye, heildigitale masterprogrammet Global health - Healthy relationships.
– Det første møtet er alltid spesielt. Ein ser heile verda kjem inn i skjermen, og eg blir så glad sjølv om eg også synest det er litt skummelt. Det er mykje som kan forsvinne mellom skjermar, som kroppsspråk og romkjensle, men vi får likevel til noko som er så varmt. Det blir ei felles forståing og audmjukskap, seier Joranger, som er konsortiumskontakt og programleiar.
LES OGSÅ: Stortingsvalet engasjerer Eda og Victoria: – Endeleg kan eg stemme
Høgt nivå
Masterprogrammet Global Health - Healthy Relationship (GLOHME) er eit program som består av tre enkeltemne og gjev til saman 15 studiepoeng. Ein kan også velje å ta eitt eller to av emna. Det er ein del av det internasjonale konsortiet, altså samarbeid mellom institusjonar, Consortium for Global Health.
I vår var første gong programmet kunne invitere alle partnaruniversiteta til å delta, kostnadsfritt.
– Gjennom programmet lærer studentane om kulturane og tankesetta til kvarandre, om det å utøve helse- og sosialhjelp i krig og konflikt og innanfor ulike kulturar, dei lærer om samspelet mellom dyr og menneske og om velferdsteknologi, seier Joranger.
Kvart av dei tre emna vert avslutta med ein gruppeeksamen kor studentane jobbar på kryss og tvers av kulturar:
– Sensorane på eksamenane i vår fekk bakoversveis av nivået studentane skriv på. Det er så imponerande. Dei kontaktar kvarandre og knyter samband sjølv om dei kjem frå veldig ulike verder, både geografisk og kulturelt.
LES OGSÅ: Hva skjer når førsteklassingene bruker halve dagen på lek?
Søkjer kunnskap trass krig
Joranger fortel at spesielt tilbakemeldingane frå dei kvinnelege studentane frå universitetet Ahfad i Sudan har skilt seg ut. Sudan er eit land som dei siste to åra har vore hardt ramma av borgarkrigen, med over ti millionar menneske på flukt.
– Dette er studentar som er i ein aktiv fluktsituasjon, i krig og krise. Studentane var takksame og fortalde kor livsforandrande programmet har vore for dei i denne situasjonen. Vi vart veldig rørte av tilbakemeldingane. Fleire Ahfad-studentar tok alle tre emna og det synest vi var veldig spesielt og imponerande, seier Joranger.
Universitetet deira eksisterer ikkje lenger fysisk og studentane har vore internt fordrivne i sitt eige land. Trass i desse enorme utfordringane har programmet gitt studentane fornya håp og retning, fortel dei sjølv i tilbakemeldingane:
– Det har ærleg talt vore eit høgdepunkt etter alt eg har vore gjennom. Frå krigen, til å bli fordrivne i landet mitt, å bu i IDP-campar (mellombels busetjingsstad) og så gå gjennom internasjonal fordriving på tvers av tre forskjellige land. Det å få høve til å vere ein USN-student betyr alt for meg og det er noko eg alltid kjem til å setje pris på, skriv ein Ahfad-student i si evaluering.
LES OGSÅ: Fikk 20 000 for gode karakterer. Deler sine beste studietips
Laga eigen diplom-seremoni
Også for studentane i India og Bangladesh er det tydeleg at programmet har betydd mykje:
– Desse diploma blir veldig godt mottekne og det er gøy. På universitetet i Manipal hadde dei stilt i stand ein seremoni der dei delte ut diplom frå USN, og det vart ei veldig formell greie. Det same hadde dei i Bangladesh.
Programmet er utvikla av fakultetet for helse- og sosialvitskap og er no ein del av Institutt for helse-, sosial- og velferdsstudium (IHSV) ved USN. Programmet har vore svært populært med ventelister i år. No planlegg dei å utvide opptaket med 10 ekstra studieplassar til våren.
LES OGSÅ: Digitaliseringsministeren ble imponert