Den nytilsette programansvarlege for studia i tradisjonskunst ved Universitetet i Sørøst-Norge campus Rauland er oppvokst i fjellbygda. Men Kim Sølve Jacobsen har vore verda rundt før han starta i den nye jobben.
I bagasjen har han ei prestisjefylt utdanning: Doktorgrad i biologi frå University of Oxford og ei master frå London School of Economics. No bur han i eit stabbur og jobbar med å vidareformidla urgamle norske tradisjonar innan tre, metall og tekstil.
– Eg brenn for å halde tradisjonar levande. Det er det næraste vi kjem å faktisk reise tilbake i tid, seier Kim Sølve Jacobsen, som har forska på alt frå korgmaking til snarefangst.
Denne helga var han også konferansier på Norsk Husflids Tekstilsymposium i Skien, der mellom anna dronning Sonja var på besøk.
– Det var herleg å vere ei forsamling der ein ikkje trong å overtyde nokon om kvifor tradisjonshandverk er verd ressursane, seier Jacobsen etter arrangementet.
LES OGSÅ: Troll, vikinger og superbugs
Forskar blant løver og reinsdyr
Som ein del av doktorgrada gjorde Jacobsen feltarbeid i Zimbabwe, med brølande løver rett utanfor husveggen. Tilbake i Noreg jobba han vidare med ein annan type rovdyrproblematikk, tett på reindrifta i Finnmark.
Samanhengen er logisk når ein skjønner perspektivet Jacobsen har med seg:
– Eg har forska på korleis det menneskelege og sosiopolitiske forholdet påverkar bestanden av rovdyr, forklarer Jacobsen.
På kontoret sitt i Rauland har han hengt opp diverse gjenstandar laga med materiale frå naturen, mødesamt produsert med urgamle teknikkar. Jacobsen oppsøkjer gjerne kunnskapsrike eldre menneske rundt omkring i Noreg og utlandet for å lære.
– Eg ønskjer å bevare kunnskapen og halde oppe den levande koplinga med tidlegare generasjonar, seier Jacobsen.
Teknikkar som er raudlista av Noregs Husflidslag, noko som betyr at dei står i fare for å bli gløymde, er av spesiell interesse.
– Å føre vidare den linja er magisk. Teknikken tægerbinding, til dømes, har ein ubrote tradisjon heilt tilbake til Osebergskipet, fortel Jacobsen.
LES OGSÅ: Blodklubb à la Rauland, rapport fra Vinterfestivalen.
Framside-modell
Det var då han figurerte på framsida av magasinet Norsk Husflid at tradisjonskunstmiljøet på Universitetet i Søraust-Noreg, campus Rauland, vart merksame på ressursen.
I magasinet vart Kim Sølve og engasjementet hans for gammalt tradisjonshandverk presentert over eit tosifra tal sider. Han viste fram urgamle spinne- og fletteteknikkar og fortalde om lidenskapen sin for sanking og sjølvberging.
Instituttleiar for tradisjonskunst og folkemusikk, Stian Roland, las intervjuet.
– Eg vart imponert og fascinert, og tanken slo meg at det er akkurat Kim Sølve sitt engasjement og særeigne kompetanse inn mot kulturarven i eit berekraftsperspektiv som er midt i blinken for utviklinga av fagfelta ved campus Rauland. Eg visste så vidt kven Kim Sølve var, så eg ringde for ein uforpliktande samtale, fortel Roland.
I utgangspunktet sjekka han moglegheita for ei form for samarbeid, sidan Jacobsen også har sterke røter i Rauland. Så byrja snøballen å rulle, og 34-åringen enda opp med å bli tilsett som programansvarleg.
– Det freista veldig å jobbe med hobbyen min, seier Jacobsen.
LES OGSÅ: Profilerte musikarar blir lærarar ved USN Rauland.
Aukande fokus på økologi
34-åringen held også kurs i korleis ein kan overleve på ting du finn i naturen. Har han litt fritid, dreg han gjerne på tur med venner i fleire dagar, utan å ha med mat.
– Då klarer vi oss utelukkande på det vi finn i naturen. Det går kjempebra! seier han.
Jacobsen har merka korleis interessa for tradisjonar og ikkje minst sanking har auka dei siste åra. Oppmøtet på kurset han held er overraskande høgt.
– Det kan nok forklarast med ein kombinasjon av meir miljøfokus, ein ustabil verdssituasjon og ei generell aukande forståing for økologi og kvar maten vår kjem frå, trur Jacobsen.
På profilen @villmatsliv kan du sjå meir av det Kim Sølve driv med.
No dreg han tilbake til Rauland med ferske inntrykk frå helgas Tekstilsymposium med tema "raudlista – vår tekstile kulturarv", eit tema han brenn for. Det er slett ikke usannsynleg at han kjem heim med nok ein ny hobby.