Bachelor i tradisjonskunst: tre-, metall- eller tekstilhandverk

Rauland - Heltid

Kvifor bachelor i tradisjonskunst?

Er du interessert i handverk, formgjeving og tradisjonar, kan du gjennom bachelor i tradisjonskunst fordjupe deg i dine interesser og få ein jobb der du bidreg til å forvalte, vidareutvikle og formidle kulturarven vidare. 

Studiet gjev deg praktisk og teoretisk innføring i tradisjonshandverk, formgjeving og tradisjonskunstens eigenart. Du vel å fordjupe deg i eitt av materialområda: tre, metall eller tekstil. Du får tett oppfølging gjennom alle tre studieåra, og møter mange av dei fremste fagpersonane innan tradisjonskunstfeltet i Noreg og Norden. 

Dette lærer du

Bachelorstudiet i tradisjonskunst: tre-, metall- eller tekstilhandverk inneheld ei brei innføring og vidare fordjuping i tradisjonskunst, innan eit av materialområda: tre, metall eller tekstil. 

Kjerneområda i studiet er:

• Utøving og skapande arbeid, formidling og bransjekunnskap: Praktisk og teoretisk tradisjonskunnskap og tradisjonsfordjuping, tradisjonelle handverksteknikkar og materialkunnskap, utøving og skaping innan valt materialområde, formidling og utstillingsarbeid. Tradisjonskunstens eigenart og formspråk, materiell og immateriell kulturarv og deira gjensidige relasjon. 
• Tradisjon og samfunn i eit lokalt og globalt perspektiv: Studiet fokuserar på ei heilskapleg forståing av tradisjonskunst, økologi, samfunn og etiske problemstillingar. 

Den utøvande/praktiske sida blir vektlagt. Studiet skal gje studenten innsikt i den sosiale og kulturelle konteksten til tradisjonskunsten både i eit lokalt, nasjonalt og internasjonalt perspektiv. Forsking, kunstnarisk utviklingsarbeid og akademisk skriving er gjennomgåande tema fram mot den endelege bacheloroppgåva i tredje studieår. Her vel du sjølv ei retning for vidare fordjuping gjennom eit større prosjektarbeid.  

Kva slags jobb får du?

Studiet utdannar fagpersonar i tradisjonskunst for eit breitt kultur- og handverksfelt. Avhengig av korleis kvar enkelt student utformar studieløpet sitt gjennom fordjuping og prosjektarbeid, kan studiet kvalifisere til å arbeide i ei rekkje instansar som: tradisjonskunstnar/handverkar med eiga bedrift, med formidling og pedagogisk arbeid, forsking, museums- og arkivarbeid, med kulturforvaltning på kommune- og fylkesplan og med organisasjonsarbeid. 

Sosialt studentmiljø

Campus Rauland ligg i den vakre fjellbygda Rauland og deler lokale med kurs- og aktivitetssenteret Raulandsakademiet. Det kreative studentmiljøet pregar kvardagen, og det er mange aktivitetar ein kan delta i som danseklubb, spikkeklubb, huskonsertar, klatring, brettspelkveldar, handverkskveldar, hardingfelegruppe, studentpub kvar onsdag m.m. Kvart år blir Rauland Vinterfestival arrangert ved campus. 

Les også

Rauland, et studiested fylt med lidenskap, inspirasjon og et unikt studentmiljø

På campus Rauland dyrker USN-student Karianne interessene sine, mens vennskap gror tett på tvers av studieretninger og årskull.

Vidare utdanningsmoglegheiter

Studiet kvalifiserer for opptak til master i tradisjonskunst og til andre kulturrelaterte masterstudium. 

Med PPU (praktisk-pedagogisk utdanning) blir du kvalifisert for arbeid i grunnskulens mellom- og ungdomstrinn, kulturskule, vidaregåande skule, folkehøgskule og for vaksenopplæring. 

Årsstudiet i instrumentmaking kan inngå som eitt av tre år i bachelorgraden i tradisjonskunst. 

Har du allereie gjennomført to år med folkekunst og ynskjer å fullføre din bachelorgrad, kan du ta direkte kontakt med instituttet i Rauland på e-post.